Bacche ki paidaesh ke ba’ad jo khoon aata hai, ise nifaas kehte hain.
Umme Salma r.a. farmati hain ke nifaas wali auratei’n Rasool Allah ke zamane me 40 din baitha karti thee’n (Namaz waghaira nahi padhti thee’n).
(Abu Dawood: at Tahaara 311 – Tirmizee: at Tahaara 139 – Ibne Majja 648) Ise Imam Haakim (V1 P175) aur Haafiz Zahabi ne Saheeh, jabke Imam Navavi ne hasan kaha.
Aksar Sahaaba aur Ta’abaeen ke nazdeek nifaas ke qhoon ki ziyada se ziyada muddat 40 din hain. Agar 40 roz ke ba’ad bhi qhoon jaari rahe to aksar ahle ilm ke nazdeek wo qhoon istehaaza hai, jis me aurat har namaz ke liey wazu karti hai. Nifaas ki kam az kam muddat ki koi had nahi.
Sayyadna Anas r.a. farmate hain: ‘Nifaas ki muddat 40 din hai illa ye ke qhoon pehle hi band ho jaae.’ (Baihaqee)
Imam Shafai farmate hain: ‘Agar aurat ko wilayat ke ba’ad qhoon aata hi nahi to is par zaroori hai ke wo ghusl kare aur namaz padhe.’
Nifaas aur haiz ke qhoon ka hukam ek jaisa hai ya’ani in halaat me namaz roza aur jama’a mana hai.
Rasool Allah ﷺ ayyam e nifaas ki namazei’n ki qaza ka hukam nahi dete the.
(Abu Dawood: at Tahaara, Baab Majja, fee Waqt an Nafsaa 312) Ise Imam Haakim aur Imam Zahabi ne Saheeh kaha.
Post a Comment