Rasoolullah ﷺ Kis Firqe Se The?

hi  -

۞ Allah pak Quran Majeed me farmate hai:

02.135 Yeh kehtay hain kay yahud-o-nasaaraa bann jao to hidayat pao gay.

02.140 Kya tum kehtay ho kay ibrahim aur ismail aur ishaq aur yaqoob (aleyhim-us-salam) aur unn ki aulad yahudi ya nasrani thay? 

Yahi baat aaj musalmano ko sochni chaiye, RasoolAllah ﷺ aur Sahaba Deobandi the ya barelwi the ya ahle hadith the, shia the ya sunni the?? In taksimo se upar hone ki zarurat hai hame. Kisi maslak ki pairwi karna galat nahi hai jabtak wo Quran aur sunnah se match karta hai lekin apne ap ko usse identify karana aur us maslak ko mukaddam rakhna deen par aur us maslak ke liye hi mehnat aur mushakkat aur bhag-daud karna usi ke liye ye chiz bilkul Islam ke talimaat ke khilaf hai jo ke Allah ke deen ne hame sikhai hai.

۩ Rasoolullah ﷺ ne farmaya: "Meri Ummah 73 firqo me bat jayegi aur wo sab jahannam me jayenge siwae ek ke. Sahabao ne pucha wo kaun firqa hoga"? Fir RasoolAllah s.a.w. ne jawab diya wo, "Wo ek hi raasta hoga jis par ham aur hamare sahaba chale."

Jamia Tirmizi, hadees- 171.

Allah pak jawab dete hai:

Ibrahim to na yahudi thay na nasrani thay bulkay woh to yak tarfa (sirf) musalman thay woh mushrik bhi na thay.

Quran, 3:67.

'..ussi Allah ne tumhara naam Musalman rakha hai is Quran se pahle aur is me bhi..

Quran, 22.78.

Kya Allah ne jo hame naam diiya hai usse behtar koi aur naam ho sakta hai???

Allah pak Quran e Majeed me farmate hai:

۩ Sab Milkar Allah Ki (Hidayat Ki) Rassi Ko Mazbuti Se Thaam lo' Aur Aapas Me (Firqon Me) Na Banto.

Surah aal e Imran (3), ayat 103.

۩ Be-shak jin logo ne apne deen ko baanta aur firqa-firqa ban gaye, Aap ﷺ ka unse koi talluq nahi, bas un ka muamla Allah ke hawale hai. Phir in ko in ka kiya hua jatla diya jaayega.

Surah Anaam(6), ayat 159.

۩ Unlogo ke tarah na hona jinhone Allah ke sath auro ko shareek kiya aur na hi unlogo ki tarah jinhone apne Deen ko baat diya aur firqe-firqe ho gaye,  har giroh uss cheez par khush hai jo un ke pas hai(ki bas wahi log haq par hai).

Surah Room(30), ayat- 31,32.

Allah hame firqa-parasti se upar uthne ki taufeek inayat farmaye..aameen.

•٠•●●•٠•